Su Trumpismu. Essay - III

(Georg Seeßlen, Spiegel online - Trompeten des Trumpismus)

(Pigada de pixabay.com)

(sighit de sa de duas partis)

Sa de 3 partis

  Apustis de sa morti arrepentina de Breitbart, Steve Bannon si pigat s'arrolu baganti de s'atzitzadori e de su disinformadori. Steve Bannon e Donald Trump pariant criaus s'unu po s'àteru; in aciunta, ca Donald Trump, su presidenti elìgiu, luegus nci-dd'at portau a su prus tzìrculu fundudu de su poderi annuddendi po cussu àterus deretus democràticus bècius de partzimenta de is poderis (Check and Balance), fiat finsas una provocatzioni bella e che arrennèscia.

  Steve Bannon est su chi pesat is dìcius popculturalis-teleosemànticus de Donald Trump a màgini polìtica cumpria e ddus ponit in pràtica. Trump fiat che una brulla mali-criada, artziau a su palcu polìticu che s'urrei Ubu, Bannon invècias teniat un'arretratu de sei strambecu meda: «Darkness is good. Dick Cheney, Darth Vader, Satan. That's power. It only helps us when they (the liberals) get it wrong. When they are blind to who we are and what we're doing.» («Scuriu andat beni. Dirk Cheney, Darth Vader, Satan. Custu est poderi. Nosi podit agiudai scéti chi issus (is liberalis) cumprendint mali a nosu. Chi funt tzurpus po su chi seus e po su chi seus faendi.») Prus craru de aici no fait a espressai s'àtera metadi de su Trumpismu (no cun calichisiat lògica discursiva, benisì in d-una màgini chi aunit Polìtica, Cultura populari e Arreligioni.) E a chini tocàt a dda fai sciri custa sabidoria? A su "Hollywood Reporter". 

  Su chi ndi stupat tambeni de Trump etotu cun d-una gana narcisista arrebella de s'artziai apitzus de is àterus, Infrusada e Sciùsciu (cussu «You Are Fired!» - Stupa-mi-nci e no torris! - teniat in totu e abertamenti una cumponenti sessuali), po Bannon est realidadi "sangunosa" a sa sèria. Aundi Trump po su poderi e s'arrichesa cosa sua si bantat de podi sfranellai comenti bolit fèmina calichisiat, a Bannon ddu denùntziant po violèntzia in famìllia (e depit torrai gràtzias de sa libertadi scéti poita ca sa pobidda sua de insandus nd'iat arretirau sa denùntzia); chi Trump ancora si trotoxat in d-una nèbida arretòrica, Bannon sparrancat is gennas a is prus formas agressivas de is de sa dereta, a su Ku-Klux-Klan, a "White Supremacy", a criminalis potentzialis. E mentras parit ca Trump siat sèmpiri imbriagu de s'efetu suu etotu, Steve Bannon est sèmpiri in circa de nemigus. Perou, a parti is alliàntzias polìticas de oi e a costau de sa bisura "Beavis & Butthead" (sèria televisiva) de custa relatzioni (duus piciocus lòfius meda de is cartonis animaus chi ant detzìdiu de no cresci prus, e chi s'allirgant che a scimprotus po dònnia sciùsciu e dònnia farta de bonu gustu pùbricu), ita ddoi at cuau agoa de su chi Bannon acinnat cun su chi funt faendi issus e de su chi is liberalis tontus nudda ndi cumprendint?

  5. Forsis nos'agiudat torra una decrarada de Bannon: «Is nemigus nostus de diaderus no funt sa genti de su partidu democràticu, su nemigu nostu diaderus funt is Mèdia.» Is tres obietivus de dònnia movimentu populìsticu de dereta funt: 

1. Sa delegitimatzioni de sa prensa liberali e democràtica de s' "Establishment". 
2. S'afortiamentu de Mèdia e bias de comunicatzioni chi nosi serbint e nosi pigant a gèniu. 
3. Faimentu/costruidura de un'arretza mediali privada. 

  Su chi serbit po cumpriri totu is tres obietivus funt duncas s'avenenamentu e su baratamentu de cudda lìngua discursiva, a s'acabu tocat a s'abetai de cussus Mèdia sa prus resistèntzia manna contras de un'imperu mediali nou. Me in is Stadus Aunius no est àteru che in Europa, innui si disfamat sa "Lügenpresse" (Prensa faulòngia) e si traballat tostau po ndi studai s'arradiu pùbrica.

  S'atriveus unu pagheddu cun sa teoria de sa trassa; forsis est scéti unu bisu malu. Est possìbili chi finsas sa presidèntzia po Donald Trump est scéti unu stàdiu transitòriu po lompi a unu poderi prus de dura. Chini dominat is Mèdia, dominat sa natzioni. Chini dominat sa lìngua, dominat su poderi. Chini dominat su gustu, dominat sa sotziedadi.

  Assumancu un'obietivu segundàriu de sa presidèntzia Trump, in mesu de totu cussu casinu de famìllia, afàrius, polìtica e narcisismu, iat a depi essi sa costruidura de un'impèriu mediali.

  Duncas in sa pesadìllia nosta Donald e Steve no bolint pesai un'impèriu mediali clàssicu comenti ancora ddu teniant Murdoch o Berlusconi, benisì un'impèriu berdaderu cun basi mediali in sa dominàntzia de su Diskurs. S'avenenamentu de sa lìngua e sa formatzioni de una realidadi alternativa funt is primus cunditzionis po cussu obietivu, o, de àtera manera, torrau a nai segundu sa teoria de arrepresentatzioni: Su poderi, aici po nai, chi cun is mèdius/ainas cosa sua bolit ponni fini a sa democràtzia, nascit in parti no pitica arremprasendi s'arrepresentazioni verbali cun sa no-verbali. Arrepresentatzioni no-verbali comenti nosu dda connosceus de sa cultura populari, nascit a su costau de is màginis e de sa farta de Meta-arrepresentatzionis (chi funt aicetotu istàntzias semànticas de controllu, chi nos'agiudant a sceberai intra de una arrepresentatzioni e de sa Realidadi). 

(sighit...)